Aita Menni Ahizpa Ospitalarioen fisioterapia arloko talde osoak aukera izan du neurorrehabilitazioaren alorreko azken ikerketak ezagutzeko eta, besteak beste, errealitate birtual murgiltzailea aintzat hartzen duten praktika klinikoetan trebatzeko. Fisioterapia neurologikoaren esparruan, ebidentzia zientifikoak babestutako teknika eta ikuspegi berriak ikasteko premia oso garrantzitsua da, gaixotasun neurologikoaren eragina gero eta handiagoa delako.
Ikerketaren eta aurrerapen teknologikoen etengabeko bilakaerak markatzen duen mundu honetan, errehabilitazio neurologikoko gure taldeentzat ezinbestekoa da eguneratuta egotea. Gaixotasun neurologikoak dituzten pazienteen fisioterapiaren eta errehabilitazioaren arloan, azken tratamendu teknikei buruzko ezagutza eguneratuak haien bizi kalitatea hobetzen lagun dezake.
Arartekoaren txosten batek ere azpimarratzen du arlo horretako profesionalen prestakuntzaren eta ikerketaren garrantzia; zehazki, neurorrehabilitazioari buruzko prestakuntza sakon baten beharra nabarmentzen du, ez dagoelako kalte zerebrala duten pazienteen jarraipenerako protokolorik, esku hartzeko gidarik eta metodologiarik. Patologia neurologikoak gora egin du biztanleriaren zahartzearen ondorioz. Halaber, gazteen artean nahasmendu neurologikoek gora egin dute, lesio traumatikoen ondorioz eta gero eta diagnostiko zehatzagoak daudelako.
Arrazoi horiengatik, urriaren 7an eta 8an, Aita Menni Ahizpa Ospitalarioen fisioterapeuten taldeak paziente neurologikoaren oreka eta kontrol motorrari buruzko prestakuntza jaso du, ebidentzia zientifikoan oinarrituta. Irakaslea Aitor Garay izan da, fisioterapiako doktorea, unibertsitateko irakaslea eta Zaragozako Miguel Servet Unibertsitate Ospitaleko Fisioterapia Neurologikoko koordinatzaile akademikoa, eta mintegiak bi eguneko iraupena izan du, 15 ordu guztira.
Mintegiaren helburuak
Prestakuntzan zehar eskola teorikoak eta praktikoak egon dira, guztiak presentzialak, eta kasu kliniko errealak aztertu eta ikuspegi terapeutiko berritzaileak aplikatu dira. Mintegiak oinarri sendo eta eguneratua eman die gure profesionalei orekaren balorazioan eta tratamenduan, betiere artatzen ditugun pertsonei eskaintzen diegun errehabilitazioaren kalitatea hobetzeko helburuarekin.
Ikastaroan, gizartean patologia neurologikoek gero eta garrantzi handiagoa dutela aztertu zen, biztanleria zahartzearen eta aurrerapen medikoen ondorioz. Paziente neurologikoaren balorazio egokia eta oreka funtsezkoak dira esku-hartzea planifikatzeko. Prestakuntzaren helburuetako batzuk hauek ziren: neurorrehabilitazioko praktika fisioterapeutikoan ikerketa eta ebidentzia zientifikoa txertatzea; balorazio eta diagnostiko egokia egitea nazioarteko arauen arabera eta balioztatutako tresnekin; oreka baloratzeko eskalak ezagutzea eta erabiltzea; paziente neurologikoekin esku hartzean algoritmo klinikoa aplikatzea; eta emaitzetan oinarritutako tratamendu planak diseinatzea.
Ikaskuntza
Badakigu oreka praktikaren bidez hobetu daitekeela, orekari “desafio” egin behar zaiola eta horren alderdi guztiak pixkanaka landu behar direla. Ikastaroaren amaieran, gainera, orekari eta horren tratamenduari buruzko gogoeta batzuk atera ditzakegu:
- Oreka zenbait sistemaren arteko interakzioa da, eta identifikatu egin behar da zein dagoen kaltetuen: estatikoa edo dinamikoa.
- Gainera, oreka ingurunearen, norbanakoaren eta zereginaren araberakoa da.
- Jarrera lantzeko hiru mota daude: lasaia, erreaktiboa eta proaktiboa.
- Egonkortasun muga batzuk daude, ondo kuantifikatuta daudenak. Muga horiek murriztu egiten dira baldintza patologikoetan.
- Muga horietatik kanpo, estrategia hauek landuko ditugu: orkatila, aldaka, pausoa eta irismena eta atzipena.
- Alterazio neurologikoetan muskuluen jarduera txikiagoa eta motelagoa da.
- Pazienteak orekan erabiltzen dituen estrategiak ebaluatu behar dira: timinga, sekuentzia, egokitzapena…
Ikasi dugu, baita ere, fisioterapian esku hartzeko ohiko protokoloak eta errealitate birtualaren bidezko entrenamendu sistemak konbinatzeak emaitzak optimizatzen dituela iktus osteko pazienteen defizit funtzionala berreskuratzeari dagokionez.
Prestakuntza Aita Menni Ahizpa Ospitalarioen Fisioterapia Arloak berak antolatu zuen –Iban Arrien da arduraduna–, eta Bilboko Aita Menni Neurorrehabilitazio Zentroaren instalazioetan egin zen.
