Aurten Donostiako Aita Menni Garuneko Kalteko Eguneko Zentroko neska-mutilek Donostiako Zinemaldia oso hurbiletik bizitzeko aukera izan dugu. Irailaren 23an Zentroko zazpi erabiltzailek Zinemaldiko esparruan egoteko aukera izan zuten Belén García begiralearekin batera.
Argazkietan ikus daitekeen moduan, erabiltzaileak alfonbra gorrian izan ziren, paseo bat eman zuten Victoria Eugenia Antzokitik Kursaaleraino eta film bat ikusteko aukera izan zuten “Zuzendari berriak” atalean Kursaal 2an. Aretora joateko, Zentroa Larrialdiak Fundazioarekin jarri zen harremanetan. Mendeko pertsonen bizitza hobetzea helburu duen erakundea da, eta sarrerak prezio merkean erosteaz eta eserlekuak erreserbatzeaz arduratu zen. Horrez gain, garraio-zerbitzua eta hiru boluntarioren laguntza eskaini zizkigun.
Oso hunkigarria izan zen ikusleak gisa lehiaketako filmetako bat ikustea: “Paula”. Film hori familia burges baten seme-alabak zaintzen lan egiten duen gazte baten bizitzari buruzkoa da. Hala ere, guztiz aldatzen da bere bizitza haurdun dagoela jakiten duenean.Filma amaitutakoan oso hizketaldi interesgarria egin zen. Hor, filmaren zuzendariak, Eugenio Canevarik, eta aktore protagonistak, Denise Labbatek, nola egin zen, nola bilatu zituzten ekoizleak eta zenbait anekdota azaldu zituzten. Zuzendaria eta aktore nagusia oso pozik agertu ziren zinemaldiak izandako harrerarekin, eta gugana etorri ziren ezagutzeko eta gurekin argazki hauek ateratzeko.
Esperientzia oso arrakastatsua izan da.Dagoeneko datorren urteko edizioan pentsatzen ari gara! Hemendik eskerrak eman nahi dizkiegu Larrialdiak Fundazioari eta Eugenio Canevariri eta Denise Labbateri, arratsaldea hain berezia egiteagatik.
