Bisita ahaztezina, emozio, oroitzapen, pasadizo eta umore onez betea, eta taldeko Gorriz, José Mari Martínez eta Mitxel Loinaz jokalari ohiekin argazkiak ez ziren falta izan.

*Argazkia: Real Sociedad

Zuatzuko (Donostia) Aita Menni kalte zerebraleko eguneko zentroko erabiltzaileek bufanda txuri-urdina jantzi zuten berriro, Reale Arenako instalazioetara hurbiltzeko. Bisita Espainiako Futbolari Beteranoen Elkarteen Federazioak  (FEAFV) antolatzen dituen Erreminiszentzia Eta futbolaren inguruko tailerren parte da, eta 2014. urtetik Aita Menni Ospitaleko hainbat baliabidek parte hartzen dute. Oraingoan, Zuatzuko taldea Realaren estadiora joan zen talde txuri-urdineko beteranoek lagunduta: Alberto ‘Bixio’ Gorriz, Jokalari Ohien Elkarteko lehendakaria; José Mari Martínez eta Mitxel Loinaz.

Berriz ere, futbolaren oroitzapenen magia agertu zen, eta barreak eta iruzkinak sortu ziren Atotxako zelai zaharraren inguruan urte haietan Donostiako klubean lehiatzen ziren jokalariek egindako balentrien eta irabazitako garaikurren inguruan. Emozioa FEAFVk zein Realak argitaratu dituzten argazki politetan islatzen da. Zelaia zapaltzeak berezi sentiarazi zituen.

Duela hiru astetik ari dira Mitxel Loinaz eta Bixio Gorriz Erreminiszentzia tailerraren azken edizio hau Zuatzun garatzen, eta 12 aste osatu arte luzatuko da. Gainera, aurreikusita dago Juan Maria Zorriqueta FEAFVko lehendakariak eta beste jokalari batzuek ere parte hartzea.

Aita Menni Ahizpa Ospitalarioek eskerrak eman nahi dizkiegu ekimen hau posible egiten duten futbolari beteranoei eta Realari, euren denboragatik, maitasunagatik, energia kutsakorragatik eta une hunkigarri hauek biziarazteagatik. Are gehiago, bereziki eskertu nahi dugu Kalte Zerebralaren Eguna aldarrikatu dugun aste honetan, bi erakundeek jendaurrean erakutsi baitute kalte zerebrala duten pertsonen eta familien aldeko babesa.

Eskerrak eman nahi dizkiegu, baita ere, Bilboko Athletic Klubari eta bere jokalari ohiei, Aita Mennik Bizkaiko hiriburuan kudeatzen duen Txurdinagabarriko adinekoentzako egoitzan erreminiszentzia tailerrak egiten jarraitzen baitute.