Aita Menni Ahizpa Ospitalarioen haurren errehabilitazio zerbitzuko koordinatzaileak, madrilgo osasun publikoko profesionalekin egindako online topaketa batean, mugimenduaren nahasmendu larriak dituzten haurrekin Marsi Bionics-en exoeskeletoaren laguntzaz egindako azterketaren emaitzak partekatu zituen.

Aita Menni Ahizpa Ospitalarioen Haur Errehabilitazio Zerbitzuaren koordinatzaile Irma Garcia Oliverosek topaketa telematiko bat izan zuen Madrilgo osasun publikoko 30 profesionalekin, ATLAS 2030 haurrentzako exoeskeletoak garun paralisia edo antzeko patologiak dituzten haurren funtzionaltasunean eta bizi kalitatean duen eraginari buruzko azterketaren emaitzak azaltzeko.

Garun paralisia eta antzeko patologiak dituzten Gipuzkoako haurrekin Marci Bionicsen asmakizun hori erabiltzearen aurretiazko emaitza itxaropentsuak jakinarazi ondoren, Aita Menni Ospitaleak eta Ctnnb1 Elkarteak lankidetza proiektu bat abiarazi zuten Ahizpa Ospitalarioek erositako exoeskeletoa Euskal Autonomia Erkidegoan erabiltzeko. Laburbilduz, proiektua hilabeteko tratamendu bat da, ATLAS 2030 exoeskeletoarekin, guztira 30 orduko errehabilitazioarekin, 20 saiotan banatuta, eta programan parte hartu duten haurren aurretiazko eta ondorengo balorazioekin. ATLAS 2030 exoeskeletoa erabiltzeko akordioaren bidez, Aita Menni Ahizpa Ospitalarioen erakundeak haurren errehabilitazioaren arloan egiten ari den ikerketarekin eta berrikuntzarekin duen konpromisoarekin jarraitzen du.

Funtzionaltasuna eta bizi kalitatea hobetzea

Joan den urriaren 26an egindako online topaketan, gure fisioterapeuta pediatrikoak sindrome oso arraro horren ezaugarriak aipatu zituen, eta arreta goiztiarrak CTNNB1 sindromean duen garrantziaz eta fisioterapiaren arlotik egindako esku hartzeaz hitz egin zuen, eta ondoren sindromea duten haurren tratamendurako garatutako programa pilotuaren atariko emaitzetan sakondu zuen. CTNNB1 sindromea neurogarapenaren nahasmendu larri bat da, funtzio motor, kognitibo eta sozialei eragiten diena. Sindrome hori duten haurrek ibiltzeko, hitz egiteko eta komunikatzeko zailtasunak dituzte, besteak beste.

Garcia Oliverosek azaldu zuenez, programaren helburua da CTNNB1 sindromea duten haurren funtzionaltasuna eta bizi kalitatea hobetzea, Marsi Bionics enpresa espainiarrak garatutako gailua erabiliz, pazienteari zutik egoten eta ibiltzen laguntzeko. Azterketaren aurretiazko emaitzek erakusten dute ATLAS 2030 exoeskeletoa erabiltzeak eragin positiboa duela haurren ibileran, orekan, indar muskularrean eta eguneroko bizitzako jardueretan parte hartzeko garaian. Euskadiko esperientzia horren berri izatean, Madrilgo Erkidegoko profesionalek hura ezagutzeko interesa agertu zuten.

————-

Ondorengo bideoan, Irma Garcia Oliverosek nahasmendu motor larriak dituzten haurrekin ATLAS 2030 exoeskeletoa erabiliz izandako esperientzia azaltzen du CTNNB1 Sindromearen Nazioarteko I. Biltzarrean.